Uniqlo都有10宗罪，muji點會冇罪

前排睇完U記同事寫uniqlo10宗罪，睇完真係好有感覺，作為差唔多性質既公司，muji又點會冇罪呢？

1.主張過分虛偽的服務
平時有去開muji買野既巴打絲打唔多唔少都聽過muji職員講野，平時有六大語句（Hello 歡迎光臨、你好，請問有咩幫到你、好，請你等等、唔好意思要你等、唔洗客氣、多謝曬拜拜下次見），到埋單比錢果陣，仲有收銀姐姐講多謝支持環保、唔好意思阻咗你咁耐，呢啲好聽啲就叫有禮貌，唔好聽就係虛偽，正正常常邊有人咁講野架，大家都好似錄音機咁背出嚟，其實冇曬靈魂，一句講曬：「做多咗啦」。

平時每日briefing都要做呢啲練習，不過出到貨場就冇人會日日講，公司好著重神秘人計劃（MSP) ，萬一果個神秘人俾低分你，嚟緊成個月就會部門主管「關心」你有冇做好greeting，啲分數仲要係咁多間分店比較，變相係啲店舖之間另一個角力既戰場。

2.OT係基本
招聘果陣講到每日工作8.5小時，當中包括一個鐘食飯，但除咗第一日落舖係唔洗OT之外，平時每日OT 1.5小時係好基本。如果你唔想OT，可以，不過要早兩日講俾主管聽，仲要視乎人手安排決定。

3.有OT冇糧出
全職既話要OT頭45分鐘先可以claim OT，變相OT頭果44分鐘但一蚊都冇，不過呢啲情況多數係靜既日子先會咁，問題不大啦。不過，pt就慘啲啦，pt人工係每半個鐘咁計，有時遇上啲mean既主管報20分、25分收工，即係最尾果20分鐘冇人工收，有時一個月都有4、5日係咁，完全睇運氣。

4.工作時間長
返一日工連埋OT大大話話成9-10個鐘，除咗一個鐘食飯之外，你係冇break放既，最多入locker房飲啖水，出去商場去過廁所，其餘時間係不停咗補貨、幫客、企場，唔會有得停。

5.四圍借舖
呢幾年開咗好多新分店，請既人又唔夠走既人多，變相間間舖人手都係岩岩好，可能一間舖夜更計埋外判保安得6個人返工，咁好自然就周圍借人啦，啲同事日日都去唔同舖做野，無論ft定pt都好，都有機會借走。久而久之，果啲同事梗係辛苦啦，最尾咪忍唔住要遞信走人，結果又少咗做同事。

6.Staff Uniform
雖然唔好Uniqlo咁刻薄，Muji會提供制服俾你（Ft 4件、pt 2件），其餘你可以一季買4件7折衫嚟做制服，不過只限黑白藍三個色。以前公司會派當季既款色俾你，照道理幫公司賣下廣告，都好合理。不過，而家公司係派啲賣到賣唔出既款式俾同事，有同事係收到4件一模一樣既制服，同一個款，同一個色，收到果陣屌曬鬼，大佬呀，而家做老夫子呀？ 最尾，啲同事又係焗住拎自己錢買衫。

7.Annual dinner
公司過去幾年都有搞annual dinner，一年一次咁好公道，不過食野同抽獎都預咗麻麻架啦，抽獎係抽返公司啲唔好賣既存貨，啲同事都係志在同其他舖啲同事傾下計、開心下。點知今年話要轉形式搞，只係得獲邀請的同事先可以參加，公司仲要出通告講俾同事聽，結果聽完啲同事仲嬲，大佬呀，你低調啲咪算，何苦要出通告講俾同事聽。

8.追生意
做零售業，追生意好正常啦，日日briefing報數邊啲部門過數、邊啲唔過咁好正常，過數就話要做多啲，唔夠數就話要追返。自從開多左分店，啲貨就好似唔夠賣咁，成日都返貨賣曬等補貨，結果生意從何來？

9.生意做多咗，加薪少咗一截
Ft同事份糧真係靠ot同incentive，普通店員底薪加得幾百，上年年尾份bonus又縮水，士氣都好低落下。PT同事間間舖既人工都一樣，就算你表現好定差，分店生意好唔好，都係得咁多，而且今年冇加過人工，pt人工得45，變相同uniqlo或者bossini果啲差距越嚟越大。

10.在職訓練
公司成日都話提供在職訓練俾同事，但其實啲老鬼好中意推人去死。成日會叫新同事去轉下場，執下啲位，等你乜都執好曬之後，一野講句唔得喎，就叫你再轉，直至佢岩心水為止。而且多數轉完場都過唔到一個月，好快又再轉過，結果你搞完又搞，無了期咁轉。

歡迎各在職離職人仕再補充

所有好既公司文化黎到香港都會變質

啲實q成日跟住人 好撚趕客 乜muji成日有人偷嘢？

其實勞工法例有無話OT幾耐先要補水？

間唔中都有人偷野 多數要到盤點先知

其實無印有服務架咩
人地萬寧要做到好似狗咁跟住D客,你地都唔駛
九成時間都係收銀果陣先有interaction

做零售多人偷嘢是常識

咁uniqlo 逐分鐘計錢，均真好多

講左話uniqlo 好啦

試過有晚大洗
執貨封貨架
搞到一點幾先走得
利申：PT

Btw無做好耐

香港邊有服務業呀
你去下其他國家就知香港人服務質素係幾低

你買一萬幾千既話 實有職員幫你
平時好多後勤野做...一日有4、5個鐘都係做呢啲無謂野

終於有人出post
Pt 人工以我認知大多係$48喎
仲知有人係$50或以上

想問依家係咪都仲係咁計ot